Die Treindler–Oma: I bin holt a Lustige

Publiziert in 3 / 2003 - Erschienen am 13. Februar 2003

Wer zu ihrem schnuckeligen ”Försterheim” kommt, wird von einem prächtigen Hahn, Herr über dreißig Hennen, begrüßt. Zur Wohnung gelangt man über eine Außenstiege. ”I hon ollm gsog, des isch lei a bessere Baracken, ober dass sie mein Mann hot bauen dirfen, da hot der Treindler Sepp, der wor domols Birgermeistr, in Tisch eini haun miassn; so losst ihn decht baun, hot er gsog, er tuat jo a viel fir die Gemeinde”. [F]Siebn Johr mit´n Hund spaziern gongen [/F] Geborn bin i 1921 in Latsch, dahoam, wia olle domols. 1949 hob i donn gheirotet, er isch 44 Johr gwesn und i 28. Ober i tat wiedr an olten nemmen, bei die oltn bischt guat kholtn. Mei Monn isch 82 Johr olt gwordn. Wia er gstorbn ischt, wor i 66. Er isch mer galling nirgensmehr  hingongen, und i war holt gearn gongen. Jo, an Bua hobm mir khob, der isch mit oan Johr derkronkt und mit 26 Johr gstorbn: I hon 26 Johr a kronks Kind khob. Und wia sie olle gstorbn woren, bin i in dr Kuchl auf und o gongen und hob mir denkt: So, jetzt hot mir der Herrgott alle gnummen, sein tuast jetzt eigentlich nur mehr a überflüssigs Mensch. Ober donn, auf oanmol, wors als ob mir jemand eppas einsogn tat, und do hob i afn Tisch einigschlogn und hob mir gsog: So Greti, jetzt rühr di, du bist noch zu jung, tua guat essn und trinken und von dem Moment an hob i mir wiedr ordentlich kocht. I muaß guat essen, weil sunst derpack i die Orbat nit. I hon an Hund khob, mit dem bin i siebn Johr long jeden Tog 1½ Stundn spaziern gongen, meistens mit dr Frau Blaas und dr Karin, des isch ihr Urenkele, und dann hob i im Summer olm finf Hasn ghob, donn bei a dreißig Hennen und an großn Gortn. Wenn i do nit ordentlich iss, tat i bei dr Orbat umfolln, des geaht nit! [F] Iberoll die Nosn a bissl drinhobm [/F] Jo, und donn bin i zehn Johr Treindler gongen, und hon koan Freita ausglossn, sogor mit an wehen Knie bin i no zum Treindler onni. I hob mir denkt, wenn man überall die Nosn a bissl drin hot, dann isch man mit die Jungen in Kontakt, weil tonzn tuan die olten Mander nit, sem saufn zua die Pudl zui. So geahts mir guat, i konn mir selber schoffn und af d´Nocht geah i. Alkohol trink i koan, immer lei mein Karottensoft. Oamol hob i beim Treindler am Obend a Cola trunken, ober dann hob i die gonze Nocht koan Aug zuaton. Die Orbat, s´guate Essn und die Freud mit die Jungen, des holtet mi a jung. Vor zwoa Johr hob i den Fox glernt, weil i nit jemand gearn an Korb gib, wenn er mi zum Tonzn frog, des isch  gonz leicht gongen. Mein Lehrer hot gsog, viele Junge lernens nit sou schnell wia du, Greti. Wenn man an guaten Tänzer hot, donn konn mon olles tonzn. Ober nit mit jedem geahts guat: An Bsoffnen, den i lei ummerziachn muass, den will i nit. [F] Die Torscher hobm se foscht in die Hosen brunzt [/F] Der Rudi Gamper, jo wenn i den im Fernsehen siech, donn sog i mir: Mit dir hon i a schun tonzt! Die Torscher sein völlig derkugelt und hom se foscht in die Hosen brunzt, wia sie gsegn hobm, dass i den Rudi Gamper frog, ob er mit mir tonzt. Dann hot er´s geton, ober er hot nit links tonzn kennen, der Rudi Gamper. Jetzt bi i eigentlich nimmer die Treindler-Oma, weil seit zwoa Johr geah i in Vinschger Hof. Dort bin i immer die Älteste, do isch sunsch niemand mit 82 Johr! I bin nämlich bei der Musi Patin, bei "die Vinschger" und in Schnals bin i a in die Musi innigrutscht. Im Vinschger Hof tuan sie nit reservieren, ober i hon zum Pinzger Manfred gsog, i mecht ollm den gleichen Tisch, an Stammtisch! Und dann hot er gsog: Jo Oma, den kriagst du! Ober im Vinschger Hof wird’s holt oanfoch ollm spat. Vor drei kimmst du do nit hoam. Ober wenn i mit jemand mitfohren kann, will i a nit raunzen, wenn i a schun um oans hoamgehn will, susch holn sie mi vielleicht des nächste Mol nimmer. Tonzn isch holt mei Lebm! Wenn i lei z´Haus herumsitz, bringt des nix! [F] A poar mochn di ollm schlecht [/F] Mir sein drei Schwestern, ober die ondern sein ondersch wia i. Oa Schwester hot amol gsog, jetzt geh i extra amol zum Treindler schauen, wia des zuageht! Oh Jessas Maria, hob i mir denkt, sem holt di stutzed. Donn wor Damenwohl, oje hot mir dei a Gosch onghäng: Jo spinnst du, hot sie gsog, mit dem Olter wirst no oan suchn zur Damenwohl. Jo, hon i gsog und wo i hingeah muasst erst segn! Donn bin i zu uan gongn, der konn guat tonzn, der isch erscht 18 Johr olt gwesn. Wia i donn aussigongn bin, hot mi oaner am Gwand zupft und hot gfrog: Oma bisch heint nit guat, heint hosch gor nit viel gmocht?  Na, hon i gsog, ober heint hon i den "Capitano" mit. In jedn Dorf sein ollm a poar, dia di ausrichten und schlecht mochn, domit muaß ma lebm. So oane hot amol gsog: Dass di nit schamst, olle Freita in Vinschger Hof onni geahn. Do hot ihre Tochter zu ihr gsog: Mamma, loss du die Greti geahn. Sei froh, dass sie guat banonder isch, wenn du a gangs, warsch a guat banonder. ”Jo, ums Leben muasch du di selber wehren”, muant die Greti zum Schluss, ”obr jetzt muaß i kochn!” Dass sie das noch lange so humorvoll und selbstbewusst tun kann, das wünschen wir der Greti von Herzen. (ch)